కలుపు మందు వాడేముందు తీసుకోవలసిన జాగ్రత్తలు

Published on March 2nd, 2022

ప్రస్తుత మార్కెట్లో పంట ఎదుగుదలకు మరియు కలుపు నివారణకు వివిధ రకాల మందులు లభిస్తున్నాయి, కానీ ఏ పైరుకు ఏ మందు ఎంత మోతాదులో వాడాలి అనే ప్రశ్న రైతులందరికీ ఉన్నప్పటికీ సరైన అవగాహన లేక రైతులు తమకు తోచిన మోతాదు లో మందులు చల్లుకోవడం వలన చాలావరకు నష్టపోతున్నారు, అయితే కలుపు అనేది ప్రధాన పొలంలో పెద్ద సమస్యగా నిలుస్తుంది ఈ కలుపు నీటికి మరియు వివిధపోషకాలకు పంటతో పోటీ పడి పంటనష్టం కలుగచేస్తుంది .

spraying-weedicides

సిఫారసు చేయని మరియు పూర్తి వివరాలు తెలియని మందులువాడుట వలన కలుపు నిర్మూలన సరిగా జరగదు. అంతే కాకుండా పంటకు నష్టం జరిగే ప్రమాదం ఉంది, ఉదాహరణకు మాగాణి వరిలో, నాటిన ౩ నుండి 5 రోజులలోపు కలుపు నిర్మూలనకు 35 గ్రాముల ఆక్సదయార్జిల్ అనే కలుపు మందును వాడుకోవాలి, అలా కాకుండా ఆ మందును తక్కువ మోతాదులో వాడితే ప్రయోజనం ఉండదు అలా అని ఎక్కువ మోతాదులో వాడితే పైరు దెబ్బతినే ప్రమాదం ఉంది .

కలుపు మందు వేసుకునేటప్పుడు తీసుకోవాల్సిన జాగ్రత్తల గురించి తెలుసుకుందాం :

  1. కొన్ని రకాల కలుపు మందులు పంట విత్తిన రెండు రోజులలోపు అంటే పంట మొలకెత్తక ముందు పిచికారీ చేయాలి వాటిని ప్రీ ఎమెర్జెన్స్ కలుపు మందులు అంటారు, ఉదాహరణకు పెండిమిథాలిన్ , ఈ కలుపు మందు పంటపై పడకుండా కలుపు పైన మాత్రమే పిచికారీ చేసుకోవాలి
  2. వరిలో 2 - 4 D సంబంధిత మందులు వాడినప్పుడు ప్రక్క పొలంలో సున్నిత పంటలు అనగా ప్రత్తి, మిరప పంటలపైనా పడకుండా ఉండేటట్లు జాగ్రత్తలు తీసుకోవాలి
  3. పొలంలో కలుపు మందు వేసుకునేటప్పుడు ఆ మందు యొక్క అవశేషాలు ముందుగా తెలుసుకోవడం మంచిది ఉదాహరణకు అట్రాజిన్ అనే మందు మొక్కజొన్నలో విశేషంగా పనిచేసినప్పటికీ ఆ మందు యొక్క అవశేషాలు భూమిలో ఎక్కువ కాలం ఉండుట వలన తర్వాత వేసే పంట పైన ప్రభావం చూపిస్తుంది
  4. మొండిజాతి మొక్కలైనా తుంగ, గరిక, దుర్భ మొదలగు వాటి నిర్మూలనకు పారక్వాట్ వంటి మందులు 4 నుండి 6 ఆకుల దశలో పూత రాకముందే పిచికారీ చేసుకోవాలి
  5. నిర్దిష్టమైన/స్పష్టమైన సూచనలు లేనిదే కలుపు మందులను, పురుగు లేదా తెగుళ్ల మందులతో కలపరాదు
  6. సాధ్యమైనంత వరకు కలుపు మందులను హాండ్ స్ప్రేయర్ తోనే పిచికారీ చేయాలి
  7. పవర్ స్ప్రేయర్ ను వాడదలచినప్పుడు నిపుణుల సలహా తీసుకోవాలి
  8. కలుపు మందులు పిచికారీ చేయుటకు సాధ్యమైనంత వరకు స్ప్రేయర్లను విడిగా ఉంచుకోవాలి
  9. ఎల్లప్పుడూ స్ప్రేయర్ల నుండి మందు సమంగా వచ్చేటట్లు పిచికారీ చేయాలి.
  10. ఒక ఎకరా విస్తీర్ణంలో కలుపు మందు పిచికారీ చేయడానికి 200 లీ. మందు నీరు అవసరమవుతుంది.
  11. ఎండ మరీ ఎక్కువ ఉన్నప్పుడు అలాగే గాలి ఎక్కువ వీస్తున్నప్పుడు కలుపు మందు పిచికారీ చేయరాదు
  12. కలుపు మందులు, పురుగు మందులవలె విషపూరితాలు, కనుక వీటిని పిల్లలకు దూరంగా ఉంచాలి.
  13. కలుపు మందులను వెనుకకు నడుస్తూ పిచికారీ చేయాలి
  14. సాధ్యమైనంతవరకు రైతులు కలుపు నిర్మూలనకు పరిమితంగా రసాయనాలను వాడుతూ, అన్తరకృషి చేయుట మొదలగు సేద్య పద్దతులను కూడా పాటిస్తూ సమగ్ర కలుపు యాజమాని పద్దతులను అవలంభిస్తే పర్యావరణతో పాటు అధిక దిగుబడులు సాధించవచ్చు

ఈ విధంగా పైన చెప్పిన జాగ్రత్తలు పాటించినచో మీ పొలం లో కలుపును సమర్ధవంతంగా అరికట్టవచ్చును, మరిన్ని పంట సలహాల కోసం జై హో కిసాన్ మొబైల్ ఆప్ ను డొన్లోడ్ చేసుకోండి.